ठाणे : प्रदीप पूर्णेकर यांच्या हत्या प्रकरणात दोषींवर कठोर कारवाई व्हावी, कुटुंबीयांना आवश्यक सुरक्षा मिळावी आणि न्यायालयीन लढ्यासाठी अनुभवी ज्येष्ठ वकिलांची मदत उपलब्ध करून दिली जाईल, अशी ग्वाही परिवहन मंत्री प्रताप सरनाईक यांनी दिली.
ठाण्यातील शिवसेना उद्धव बाळासाहेब ठाकरे गटाचे विभागप्रमुख प्रदीप पूर्णेकर यांच्या हत्या प्रकरणाच्या पार्श्वभूमीवर राज्याचे परिवहन मंत्री तथा शिवसेनेचे नेते प्रताप सरनाईक यांनी आज पूर्णेकर कुटुंबीयांची भेट घेऊन त्यांचे सांत्वन केले. या कठीण प्रसंगी शिवसेना आणि उपमुख्यमंत्री तथा शिवसेनेचे मुख्य नेते एकनाथ शिंदे पूर्णेकर कुटुंबीयांच्या पाठीशी ठामपणे उभे असल्याचा विश्वास त्यांनी दिला.
उपमुख्यमंत्री एकनाथ शिंदे यांच्याशी कुटुंबीयांचा संवाद
पूर्णेकर कुटुंबीयांशी आपले अनेक वर्षांपासून जिव्हाळ्याचे आणि कौटुंबिक संबंध असल्याचे प्रताप सरनाईक यांनी सांगितले. बाळकृष्ण पूर्णेकर, जयनाथ पूर्णेकर यांच्यासह कुटुंबातील सदस्यांशी जुने संबंध असल्याचे नमूद करत, या दुःखद प्रसंगी कुटुंबीयांना आधार देणे ही आपली जबाबदारी असल्याची भावना त्यांनी व्यक्त केली.
कुटुंबीयांची भेट घेतल्यानंतर सरनाईक यांनी उपमुख्यमंत्री एकनाथ शिंदे यांच्याशी फोनवरून संपर्क साधला आणि पूर्णेकर कुटुंबीयांचे त्यांच्याशी बोलणे करून दिले. यावेळी शिंदे यांनीही कुटुंबीयांना धीर देत, या कठीण काळात त्यांच्या पाठीशी उभे राहण्याचा विश्वास दिला.
न्यायासाठी ज्येष्ठ वकिलांची मदत
प्रदीप पूर्णेकर हत्या प्रकरणाची निष्पक्ष चौकशी होऊन दोषींवर कायद्यानुसार कठोर कारवाई झाली पाहिजे, अशी भूमिका प्रताप सरनाईक यांनी मांडली. पूर्णेकर कुटुंबीयांना न्याय मिळवून देण्यासाठी शिवसेनेच्या वतीने अनुभवी ज्येष्ठ वकील आणि सीनियर कौन्सिल यांची मदत उपलब्ध करून देण्यात येईल, असे त्यांनी स्पष्ट केले.
या प्रकरणात आवश्यक असलेली कायदेशीर मदत उपलब्ध करून देण्याची जबाबदारी आपण घेतल्याचेही सरनाईक यांनी सांगितले.
कुटुंबीयांच्या सुरक्षेसाठी पोलिसांना सूचना
पूर्णेकर कुटुंबीयांच्या सुरक्षेच्या प्रश्नावरही सरनाईक यांनी भूमिका स्पष्ट केली. कुटुंबीयांच्या सुरक्षेबाबतच्या मागण्यांची दखल घेऊन आवश्यक ती सुरक्षा व्यवस्था करण्यात यावी, अशा सूचना संबंधित पोलीस अधिकाऱ्यांना दिल्याचे त्यांनी सांगितले.
तपासात कोणताही राजकीय दबाव येता कामा नये आणि दोषींवर कायद्यानुसार कारवाई झाली पाहिजे, अशी अपेक्षाही त्यांनी व्यक्त केली.
भेटीस १८ दिवसांचा विलंब झाल्याबद्दल दिलगिरी
पूर्णेकर कुटुंबीयांची भेट घेण्यास १८ दिवसांचा विलंब झाल्याबद्दल प्रताप सरनाईक यांनी दिलगिरी व्यक्त केली. या घटनेनंतर ठाण्यात निर्माण झालेल्या तणावपूर्ण वातावरणात कोणताही अनुचित प्रकार घडू नये, या दृष्टीने योग्य वेळ साधून भेट घेण्याचा निर्णय घेतल्याचे त्यांनी स्पष्ट केले.
प्रत्यक्ष भेटीस उशीर झाला असला, तरी एकनाथ शिंदे यांच्या मार्गदर्शनाखाली पूर्णेकर कुटुंबीयांच्या पाठीशी उभे राहण्याची भूमिका कायम असल्याचे सरनाईक यांनी सांगितले.
राजकारणापेक्षा कुटुंबीयांना न्याय मिळणे महत्त्वाचे
या दुःखद घटनेचा राजकीय फायदा घेण्याऐवजी पीडित कुटुंबीयांना आधार देणे, त्यांच्या सुरक्षेची काळजी घेणे आणि न्यायासाठी आवश्यक ती कायदेशीर मदत उपलब्ध करून देणे महत्त्वाचे असल्याचे प्रताप सरनाईक म्हणाले.
या प्रकरणातील पुढील घडामोडींवर लक्ष ठेवण्यात येणार असून, पूर्णेकर कुटुंबीयांना आवश्यक ती मदत यापुढेही केली जाईल, असे त्यांनी स्पष्ट केले.
“पूर्णेकर कुटुंबीयांना न्याय मिळवून देण्यासाठी आम्ही त्यांच्या पाठीशी ठामपणे उभे आहोत. त्यांना आवश्यक कायदेशीर मदत आणि सुरक्षा मिळवून देण्यासाठी आम्ही कटिबद्ध आहोत,” अशी ग्वाही प्रताप सरनाईक यांनी दिली.
About the Author
